கோவையில் ஆட்டிசம் பாதித்த குழந்தைக்கு யூடியூபர் இர்பான் உதவி செய்துள்ளார். பிரியாணி போட்டியில் கலந்து கொண்டவருக்கு உதவிய சமூக வலைத்தள வாசிகளை பொதுமக்கள் வாழ்த்து தெரிவித்து வருகின்றனர். சமூக வலைத்தளம் மூலம் ஒன்றிணைந்த யூடியூபர்களை பலரும் பாராட்டி வருகின்றனர்.
வெண்ணிலா கபடிக்குழு திரைப்படத்தில் புரோட்டா கடையில் 50 பரோட்டா சாப்பிட்டால் 100 ரூபாய் பரிசு என்றும், சாப்பிட்ட பரோட்டாவுக்கு காசு கொடுக்க வேண்டாம் என்றும், அவ்வாறு சாப்பிட முடியவில்லை என்றால் சாப்பிட்ட பரோட்டாவுக்கும், 100 ரூபாயும் கொடுக்க வேண்டும் என்று போட்டி வைப்பார்கள்.அதில் நடிகர் சூரி நடித்திருப்பார். இதன் மூலம் தான் அவருக்கு பரோட்டா சூரி என்ற பெயரே வந்தது. இதேபோல் கோவை மாவட்டத்தில் கோவை ரயில் நிலையம் அருகே உள்ள போச்சே ஃபுட் எக்ஸ்பிரஸ் கடந்த வாரம் புதன்கிழமை அன்று பிரியாணி போட்டி ஒன்று நடத்தப்பட்டது. ஆறு பிரியாணி சாப்பிட்டால் ஒரு லட்சம் ரூபாய் பரிசும் , ஐந்து பிரியாணி சாப்பிட்டால் 50 ஆயிரம் பரிசு, மூன்று பிரியாணி சாப்பிட்டால் 25 ஆயிரம் பரிசும் என அதிரடியாக விளம்பரப்படுத்தப்பட்டிருந்தது.
இதற்காக இந்த போட்டியில் பங்கேற்பதற்காக கோவை மாவட்டம் மட்டுமின்றி கேரளாவில் இருந்தும் பல்வேறு பகுதிகளிலிருந்து நூற்றுக்கணக்கானோர் குவிந்தனர். இந்த போட்டியில் குழந்தையின் மருத்துவ செலவிற்காக போட்டியில் ஓட்டுநர் ஒருவரும் பங்கேற்றார்.ஆனால் இந்த போட்டியில் நிர்ணயிக்கப்பட்ட 6 பிளேட் பிரியாணியை யாரும் சாப்பிடவில்லை. போட்டியில் அதிகமாக உட்கொண்டவர்கள் அனைவரும் வரிசைபடுத்தி பிரியாணி வெற்றியாளர்கள் அறிவித்தனர். இதில் 1.சதீஸ் (3 பிளேட்) – 1 லட்சம் பரிசு பெற்றார். இவர் கூலித்தொழிலாளியாக உள்ளார். இதனைத்தொடர்ந்து கணேச மூர்த்தி (2 மற்றும் அரை பிளேட்) – 50 ஆயிரம் பரிசு பெற்றார். இவர் வாடகை கார் ஓட்டுநராக உள்ளார். இவர் ஆட்டிசத்தால் பாதிக்கப்பட்ட தனது குழந்தையின் மருத்துவச் செலவிற்காக உணவு போட்டியில் பங்கேற்றவர் என்பது குறிப்பிடத்தக்கது. இறுதியாக கிரண் (2 மற்றும் கால் பிளேட்) 25 ஆயிரம் பரிசு பெற்றார், இவர் ஆட்டோ ஓட்டுநராக உள்ளார்.
இந்நிலையில் தனது குழந்தையின் மருத்துவ செலவுக்காக கணேசமூர்த்தி என்பவர் கலந்து கொண்டது தொடர்பாக சமூக வலைத்தளங்களில் செய்தி வைரலானது. இது தொடர்பான வீடியோவும் சமூக வலைத்தளங்களில் அதிகம் பகிரப்பட்டது. இந்நிலையில் ஆட்டிசம் பாதிக்கப்பட்ட குழந்தைக்காக பிரியாணி போட்டியில் கலந்து கொண்ட நபருக்கு யூடியூபர் இர்பான் உதவி செய்து உள்ளார். சமூக வலைதளத்தில் மூலம் யூடியூபர்கள் பலர் ஒன்றிணைந்து சுமார் ரூ.1,05,000 குழந்தையின் மருத்துவ செலவுக்காக அளித்துள்ளனர்.
யார் யார் எவ்வளவு பணம் கொடுத்தார்கள் என்று வரிசையாக சொல்லி யூடியூபர் இர்பான் பணத்தை நேரடியாக கணேசமூர்த்தியிடம் கொடுத்தார். கணேசமூர்த்தி மற்றும் அவரது மனைவி ஆகியோர் கண்ணீர் வடித்தனர். ஆட்டிசத்தால் பாதிக்கப்பட்ட தங்களின் பிள்ளைக்காக பணம் கொடுத்து உதவியர்களுக்கு நன்றி தெரிவித்தனர். இந்த வீடியோ காண்போர் அனைவரையும் கலங்கச் செய்தது.
